Noticias y alertas

Güei traemos una entrega nueva de ¿Qué cousa, couseḷḷina ía...? Nesti casu, vamos falar de las partes de las paneras ya los hor...

07/04/2021







Güei traemos una entrega nueva de ¿Qué cousa, couseḷḷina ía...?



Nesti casu, vamos falar de las partes de las paneras ya los horrios/horros.



¿Cúmo chamáis vós a las partes diferientes? Traemos ilustrada namás una parte fundamental, el pial ou pioḷḷu, formáu por dúas partes, el soporte propiamente, que puede ser de madera ou piedra; ya la muela ou fogacera, qu'ía la piedra que se coloca ente'l soporte ya las trabes pa que nun suban los ratos, pero hai muitas más.



Nós conecemos del Occidente asturfalante las que vos ponemos embaxo, pero de seguru qu'hai muitas más, a ver qué cuntáis prehí...



La coronda/colonda/curonda ou corondia/curondia ía la pieza central de las paneras ya los horrios/horros. La estructura ciarrada ou se guardan ya conservan las cousas, normalmente en tuñas.



El caramanchón, debaxo la panera, ía l'espaciu de debaxo la curonda/curondia ou se guardan arabías ya trastos varios.



El cordor ou corredor, cuando lu hai, ía la zona d'alredor de la curonda/curondia.



El mandil son las tablas que ciarran el cordor ou corredor.



La pontinal ou'l pontonáu ía l'accesu de madera que te da pasu a la panera ou al horriu/horru.



Las trabes, amás de los montones de nieve, son las cuatro vigas d'encima los piales ou pioḷḷos sobre las que s'aguanta la estructura del horriu/horru ou de la panera.



El cumu ou la cumar/cumal ía la viga principal que sostién el teáu/tiáu ou techáu/ticháu de la panera.



Los aguilones son las cuatro piezas de madera qu'estructuran las cuatro auguas del teáu/tiáu ou techáu/ticháu de los horros/horrios ya las paneras cuando son a cuatro auguas, porque n'Asturias tamién cuntamos con dalguna panera a dúas ya conos horrios/horros de Los Beyos.



Ya, p'acabar, las paxareras son las figuras de piedra que se colocan no vértiz ou vértices del teáu/tiáu ou techáu/ticháu, sigún se trate d'un horriu/horru ou d'una panera.



¿Qué nomes se dicen nos vuesos ḷḷugares? Cuntádenos, tamos deseando aprender de vós... :)

#quécousacouseḷḷinaía

#pial

#pioḷḷu

Más Información

Cerrar [X]Uso de cookies

Utilizamos cookies propias y de terceros para mejorar nuestros servicios y recopilar datos estadísticos sobre hábitos de navegación. El uso de cookies es necesario para la notificación de incidencias. Si continúa navegando, consideramos que acepta su uso. Puede obtener más información, o bien conocer cómo cambiar la configuración, en nuestra Política de cookies